“Улаанбаатар хотын гэр хорооллыг хөгжүүлэх хөрөнгө оруулалтыг дэмжих хөтөлбөр”-ийн төслөөс дэд төвүүдийн залуучуудын оролцоог дэмжих зорилгоор зорилтот дүүргүүдийн залуучуудын зөвлөлийн гишүүд болон залуу манлайлагчдад “Залуучуудын утга учиртай оролцоо” сэдэвт чадавхжуулах сургалтыг Нийслэлийн Гэр Бүл, хүүхэд, залуучуудын хөгжлийн газартай хамтран зохион байгууллаа. Сургалтанд Сонгинохайрхан, Чингэлтэй, Сүхбаатар дүүргийн залуучуудын зөвлөлийн 89 гишүүн, манлайлагчид хамрагдаж, залуучуудын утга учиртай оролцоо, залуучууд орон нутгийнхаа хөгжилд оруулах хувь нэмэр болон хамтын оролцооны талаар харилцан туршлага солилцон, дадлага ажлуудыг ажиллав. Мөн дэд төвийн залуучуудыг хэрхэн идэвхжүүлэх арга зүй, залуучуудын оролцооны олон улсын туршлагыг суралцаж, залуучуудад тулгамдаж буй асуудлуудаар ярилцаж, зөвлөлдөж, цаашид төлөвлөгөө гарган хамтран хэрэгжүүлэхээр боллоо. Сургалтын үеэр дэд төвүүдийн бүтээн байгуулалтууд, төслийн явцын мэдээлэл, Азийн Хөгжлийн банкны хамгааллын бодлого, нийгмийн хөгжил, жендэр, олон нийтийн оролцооны үйл ажиллагаанууд болон шаардлагууд, Хүүхдийг Ивээх Сантай хамтран хэрэгжүүлж буй “Улаанбаатар хотын гэр хороололд хүртээмжтэй, таатай орчин бүрдүүлэхэд залуусын оролцоог нэмэгдүүлэх төсөл”-ийн танилцуулгууд хийгдлээ.