“Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөр” төслийн “Дэд төвийг хөгжүүлэх институц, чадавхыг бий болгох” зөвлөх үйлчилгээний баг дэд төвүүдийг цаашид тогтвортой хөгжүүлэх механизмыг бий болгох, институцийн чадавхыг бэхжүүлэх чиглэлээр тодорхой ажлуудыг хэрэгжүүлж байгаагийн зэрэгцээ гэр хорооллыг хөгжүүлэхэд жишиг болохуйц загвар төслийн төлөвлөлтийн санал гарган ажиллаж байна.

Энэ ажлын хүрээнд Баянхошуу дэд төвийн “N5, N6” блок буюу СХД-ийн 8-р хорооны 50 айлын орон сууц орчмын 15га газрыг хөгжүүлэх барилгажилтын төслийн ерөнхий концепцийг боловсруулж байна. Уг барилгажилтын төслийн ерөнхий концепцийг тухайн блокийн оршин суугчид болон газрын эздэд танилцуулж, санал солилцох зорилгоор 2023 оны 11-р сард 4 удаагийн зөвлөлдөх уулзалтыг зохион байгууллаа. Уулзалтад нийт 126 иргэн оролцож барилгажилтын төслийн эхний саналтай танилцсан ба энэ саналыг дэмжиж байгаагаа хэлж идэвхтэй оролцлоо. 

Уулзалтын төгсгөлд газрын эзэд, оршин суугчид бидний санал болгож буй энэ концепцийн дагуу хөгжүүлэх ажлыг аль болох хурдан хугацаанд хэрэгжүүлэхийг хүсэж буйгаа илэрхийлэв.