Улаанбаатар хотыг 2020 он хүртэл хөгжүүлэх ерөнхий төлөвлөгөөг хэрэгжүүлэхтэй холбоотойгоор Азийн Хөгжлийн банк болон Европын Хөрөнгө Оруулалтын банкны хөнгөлөлттэй зээлээр “Гэр хорооллыг хөгжүүлэх, хөрөнгө оруулалтыг дэмжих хөтөлбөр” төслийг Нийслэлийн Засаг Даргын тамгын газраас хэрэгжүүлж эхэлсэн билээ. Төслийн хүрээнд хотын нутаг дэвсгэрийн тэнцвэртэй хөгжлийг хангах зорилгоор нэг төвт хотоос олон төвт хот болгон хөгжүүлэхээр тусган, Улаанбаатар хотыг зургаан дэд төвтэй байхаар төлөвлөсний нэг нь “Сэлбэ” дэд төв юм.

Сүхбаатар дүүргийн 13,14 дүгээр хороо, Чингэлтэй дүүргийн 14,18 дүгээр хорооны нутаг дэвсгэр болох 158 га талбай “Сэлбэ” дэд төвд хамрагддаг бөгөөд тус төвд 26.68Мвт хүчин чадал бүхий олон улсын стандартад нийцсэн дулааны станц, дулааны шугамыг барихаар төлөвлөн олон улсын нээлттэй тендер зарлахад “Хүрд” ХХК болон БНХАУ-ын “Шиншианг Гонгшэн Бойлер” ХХК түншлэл шалгарсан. Тус дулааны станцын барилгын шав тавих ёслолын ажиллагаа 2017 оны 11-р сарын 01-ны өдөр боллоо. Ёслолын ажиллагаанд Эрчим Хүчний Сайд Ц.Даваасүрэн, Улаанбаатар хотын захирагч С.Батболд болон албаны хүмүүс оролцсон юм.

Тэд тус дулааны станц барих газрыг чөлөөлсөн иргэдэд дэд бүтцийн ажлын эхлэлийг амжилттай тавихад бодитой хувь нэмэр оруулсанд талархахын сацуу төслийн хүрээнд иргэдийн идэвх оролцоо сул байвал нааштай үр дүн гарахад хүндрэл учирна. Иймд иргэд цаашид улам идэвхтэй оролцон, төслийн үр өгөөжийг хүртэх хэрэгтэйг уриаллаа.

Уг дулааны станц болон дулааны шугамын ажил хийгдсэнээр инженерийн шугамд 6,000 орчим өрхийн 25,400 иргэн хамрагдана. Дэд төвийн иргэд орон сууцны нөхцлөө сайжруулснаар Улаанбаатар хотын агаарын бохирдлын 80 гаруй хувийг үүсгэж буй гэр хорооллын нүүрсний хэрэглээ 15 мянган тонноор буурна хэмээн тооцож байна. “Сэлбэ” дэд төв нь хотын төвийн агаарын урсгалын дээр байрладаг бөгөөд энэ хэсгийн нүүрсний хэрэглээ буурч, агаарын чанар сайжрах нь төсөл хэрэгжиж байгаа газар болон хотын төвд ажиллаж амьдарч буй ард иргэдийн эрүүл мэндэд эерэг нөлөө үзүүлэх юм.