“Гэр хорооллыг хөгжүүлэх хөрөнгө оруулалтыг дэмжих хөтөлбөр” төслийн Газар чөлөөлөлт нүүлгэн шилжүүлэлтийн ажлын явц болон тулгамдаж буй асуудлыг хэлэлцэн шийдвэрлэх хурал Нийслэлийн Хангарьд ордны 14-р давхарт 2017 оны 11 сарын 16-ны өдөр болж өнгөрлөө.

Хуралд Дэд бүтэц, гэр хорооллын хөгжлийн асуудал хариуцсан орлогч бөгөөд төслийн захирал П.Баярхүү, Төслийн зохицуулагч Д.Авирмэд, НИТХ-ын тэргүүлэгч бөгөөд төслийн дэд зохицуулагч Д.Мөнхжаргал, НГА-ны Газар чөлөөлөлтийн хэлтсийн дарга Д.Энхтөр, НГА-ны орлогч дарга Д.Нямдаваа, ЧД-ийн Засаг дарга Ж.Эрдэнэбат, СХД-ийн Засаг дарга Ж.Сандагсүрэн, Сүхбаатар дүүргийн Засаг даргын орлогч Ц.Шижир болон албаны бусад хүмүүс оролцсон юм.

Хурлыг Улаанбаатар хотын Дэд бүтэц, гэр хорооллын хөгжлийн асуудал хариуцсан орлогч, төслийн захирал П.Баярхүү ахлан газар чөлөөлөлөх ажилд тулгараад байгаа хүндрэл бэрхшээлийг танилцуулан хэлэлцэв. Хурлын үр дүнд Дэд төвүүдийн газар чөлөөлөлтийн ажлыг дэмжин ажиллах зорилгоор төсөл хэрэгжиж буй гурван дүүргийн Засаг даргын орлогч нараар ахлуулсан ажлын хэсэг байгуулах, уг ажлын хэсгийг байнгын ажиллагаатай байхаар зохион байгуулахаар үүрэг болгосон байна. Мөн Сонгино Хайрхан, Чингэлтэй болон Сүхбаатар дүүргүүдийн Улсын бүртгэлийн хэлтэстэй хамтран ажиллаж, газар чөлөөлөлтийн ажил дээр бичиг баримтыг шуурхайлан шийдвэрлэж байхаар шийдвэрлэжээ.

Ингэснээр энэ оны 12-р сарын 10-ны өдөр гэхэд газар чөлөөлөх ажлыг бүрэн дууссан байхаар тооцоолон ажлыг эрчимжүүлэх арга хэмжээ авлаа.