Улаанбаатар хотыг 2030 он хүртэл хөгжүүлэх ерөнхий төлөвлөгөөг хэрэгжүүлэхтэй холбоотойгоор Азийн Хөгжлийн банк болон Европын Хөрөнгө Оруулалтын банкны хөнгөлөлттэй зээлээр “Гэр хорооллыг хөгжүүлэх, хөрөнгө оруулалтыг дэмжих хөтөлбөр” төслийг хэрэгжүүлж эхэлсэн билээ. Төсөл гурван үе шаттайгаар 9 жилийн хугацаанд хэрэгжих юм.
Төслийн I шатны хүрээнд нийслэлийн хойд бүсийг Баянхошуу, Сэлбэ дэд төв болгон хэсэгчлэн хөгжүүлэх бөгөөд одоогийн байдлаар хоёр дэд төвд түр суурьшуулах 50 айлын орон сууц тус бүр нэгийг, мөн нийт 8.6 км урт ариутгах татуургын гол шугам сүлжээг тавьсан байна.
Дэд бүтцийн бусад ажлуудыг гүйцэтгэхээр газар чөлөөлөх ажлыг эрчимжүүлэн ажиллаж байна. Дэд төвүүдэд хийгдэх инженерийн болон дэд бүтцийн бүтээн байгуулалтын ажлуудын нээлтийн үйл ажиллагааг 2018 оны 5 дугаар сарын 25-ны өдөр зохион байгууллаа. Нээлтийн үйл ажиллагаанд Улаанбаатар хотын захирагч бөгөөд нийслэлийн засаг дарга С.Батболд, НИТХ-ын дарга С.Амарсайхан болон нийслэл дүүргийн төлөөлөл оролцов.
Нээлтийн арга хэмжээнд Баянхошуу, Сэлбэ дэд төвүүдэд дэд бүтэц, бүтээн байгуулалтын ажлуудыг гүйцэтгэж буй компаниудын удирдлагууд оролцон тус тусын ажлын явц, хүрэх үр дүнгийнхээ талаар танилцуулсан юм. Энэ үеэр Улаанбаатар хотын захирагч бөгөөд нийслэлийн засаг дарга С.Батболд гүйцэтгэгч компаниудын төлөөлөл, төсөл хэрэгжүүлэх нэгжийн хамт олонд ажлаа цаг тухайд нь чанартай хийж гүйцэтгэхийг сануулахын сацуу төслийн хүрээнд хийж буй бүтээн байгуулалтын ажлыг дэмжин идэвх санаачлалтай оролцож буй иргэдэд талархал илэрхийллээ.
Цаашид Сэлбэ дэд төвд:
- 26.68 Мвт хүчин чадалтай дулааны станц барих ажил. • 24м, 30м, 60м-ийн урттай 3 ширхэг төмөрбетон гүүрийн барилгын ажил.
- Тэнхлэгээрээ 48.0 х 30.0 м хэмжээтэй, 2 давхар, 240 хүүхдийн цэцэрлэгийн барилга угсралтын ажлыг дотор, гадна инженерийн шугам сүлжээ, гадна зам талбай, тохижилтын ажлын хамт гүйцэтгэх.
- Тэнхлэгээрээ 50.0 х 33.0 м хэмжээтэй, хагас нум хэлбэртэй болон тэгш өнцөгтийн блокоос бүрдсэн 2 давхар барилга угсралтын ажлыг дотор, гадна инженерийн шугам сүлжээ, гадна зам талбай, тохижилтын ажлын хамт гүйцэтгэх.
- 1,000м3 хүчин чадалтай усан сан ба насос станцын барилга угсралт болон ус хангамжийн шугам хоолой нийлүүлж, суурилуулах ажил.
- Сэлбэ дэд төвд 3.7 км авто замыг 2.0 км үерийн ус зайлуулах суваг болон 7.5 км урт гудамжны гэрэлтүүлгийн хамт, 3.9 км урт цэвэр усны шугам хоолой, 5.5 км урт бохир усны шугам хоолой, 4.4 км урт дулаан дамжуулах шугам хоолойн барилга угсралтын ажлыг холбогдох ажлуудын хамт гүйцэтгэх.
- Сэлбэ дэд төвд 1.9 км авто замыг 2.4 км үерийн ус зайлуулах суваг болон 4.7 км урт гудамжны гэрэлтүүлгийн хамт, 2.0 км урт цэвэр усны шугам хоолой, 4.2 км урт бохир усны шугам хоолой, 4.6 км урт дулаан дамжуулах шугам хоолойн барилга угсралтын ажлыг холбогдох ажлуудын хамт гүйцэтгэх.
- Сэлбэ дэд төвд 2.4 км үерийн хамгаалалтын сувгийн барилга угсралт болон ҮХС-ийн хамгаалалтын хайсны угсралт суурилуулалтын ажил.
Үр дүн:
Сэлбэ дэд төвд хийж буй бүтээн байгуулалтын ажлуудын үр дүнд нийслэлийн Сүхбаатар, Чингэлтэй дүүргүүдийн нутаг дэвсгэрийг дамнасан нийт 158 га талбайд оршин сууж буй иргэдийг дулааны эрчим хүчээр найдвартай хангах боломжтой болно. /Уг дулааны станц баригдаж бүрэн ашиглалтад ороход эхний ээлжид 35-р сургууль, 51-р цэцэрлэг гэх мэт төрийн болон нийгмийн үйлчилгээний байгууллагууд холбогдохоос гадна дэд төвд амьдарч буй 25,400 орчим хүн дулааны шугам сүлжээнд холбогдох боломж бий. Дулааны шугам сүлжээнд иргэд холбогдох эсэх нь иргэдийн оролцоо, идэвхээс шууд хамаарна.
Иргэд идэвхтэй оролцвол, дулааны станц ашиглалтад ороход дулааны шугам сүлжээнд холбогдон тав тухай амьдрах боломж бүрдэх ба бидний өмнө тулгарсан том бэрхшээл болох агаарын бохирдлыг бууруулахад бодитой хувь нэмэр оруулна. Уг дулааны станц ашиглалтад орж айл өрхүүд шугам сүлжээнд холбогдсоноор хотын агаарын бохирдлын 80 гаруй хувийг үүсгэж буй гэр хорооллын халаалтын болон айл өрхийн зуухны түүхий нүүрсний хэрэглээг жилд 15,000 тонноор бууруулж, 3,700 өрхийн зуух, 10 гаруй ААН-ийн уурын зуухыг халах боломж байна/.
Сэлбэ дэд төвийн иргэдийг ундны усны найдвартай эх үүсвэрээр хангахаас гадна тус дэд төвд байгаа цэцэрлэгийн насны нийт хүүхдүүдийн СӨБ хамрагдалт 55.77% хүртэл нэмэгдэнэ. Түүнчлэн МСҮТ-ээр дамжуулан мэргэжил олгосноор мэргэжилтэй ажилчид нэмэгдэх ба бизнес эрхлэгчдэд үзүүлэх дэмжлэг, үйлчилгээний хүртээмж сайжирна. Авто зам ашиглалтад орсноор нийтийн тээврийн үйлчилгээний хүртээмжийг гэр хорооллын иргэдэд ойртуулах боломж бүрдэх ба иргэдийн авто машин ашиглалтын зардал буурч өрхийн амьжиргаанд эерэгээр нөлөөлнө.
