“Улаанбаатар хотын гэр хорооллыг хөгжүүлэх, хөрөнгө оруулалтыг дэмжих хөтөлбөр (УБГХХХОДХ)” төслийн “Дэд төвийг хөгжүүлэх институц, чадавхыг бий болгох” зөвлөх үйлчилгээний баг дэд төвүүдийг хөгжүүлэх институцийн чадавхыг бэхжүүлэх ажлын хүрээнд “Гэр хорооллыг хөгжүүлэх үйл ажиллагаанд оролцогч байгууллагуудын мэргэжилтнүүдийн чадавхыг бэхжүүлэх сургалт”-ын эхний шатны сургалтыг 2023 оны 12 дугаар сарын 07-ны өдөр зохион байгууллаа. 

Уг сургалтад Нийслэлийн Орон сууцны бодлогын газар, Нийслэлийн Орон сууцны корпораци ХК болон УБГХХХОДХ төслийн нэгжийн нийт 56 мэргэжилтнүүд оролцож дэд төвийг хөгжүүлэхэд хот төлөвлөлтийн болон хууль, эрх зүйн хувьд анхаарах асуудлуудыг ярилцаж, багийн менежментийг сайжруулах, бүтээмжийг нэмэгдүүлэх аргачлалд суралцлаа. Сургалтын эхний хэсэгт зөвлөх багийн ахлагч, хот төлөвлөлтийн мэргэжилтэн Б.Батболд “Гэр хороолол ба Хот төлөвлөлт”, зөвлөх багийн хуульч Б.Батчимэг “Гэр хорооллын газрыг дахин төлөвлөн барилгажуулах үйл ажиллагааны эрх зүйн орчин, төсөл хэрэгжүүлэхэд тулгарч буй хүндрэлүүд” сэдвээр илтгэл тавьж санал солилцсон бол 2 дугаар хэсэгт “Дейл Карнеги” сургалтын төвтэй хамтран “Хүчирхэг багийг бий болгох”, “Асуудлыг задлан шинжлэх ба зөв шийдвэр гаргах” агуулгын хүрээнд сургалт хийлээ. 

Энэхүү чадавхыг бэхжүүлэх сургалтын хоёр дугаар үе шатыг 12 дугаар сарын 20-22-ны өдрүүдэд зохион байгуулахаар төлөвлөж байна.