“Улаанбаатар хотын гэр хорооллыг хөгжүүлэх хөрөнгө оруулалтыг дэмжих хөтөлбөр”-ийн Төсөл-1-ийн хүрээнд Азийн Хөгжлийн Банкны 100% хөнгөлөлттэй зээлийн санхүүжилтээр Баянхошуу дэд төв, Сонгинохайрхан дүүргийн 8-р хорооны нутаг дэвсгэрт Бизнес инкубатор, мэргэжлийн сургалт үйлдвэрлэлийн төвийн барилгыг 2019 оны 3 сард барьж дуусгасан.
Баянхошуу дэд төвийн Бизнес инкубатор, мэргэжлийн сургалт үйлдвэрлэлийн төвд өнөөдөр буюу 2019 оны 5-р сарын 23-ний өдөр Улсын комисс амжилттай ажиллаж барилгыг байнгын ашиглалтад оруулан “Нийслэлийн өмчийн ашиглалт удирдлагын” газарт хүлээлгэн өгөхөөр боллоо.
Баянхошуу дэд төвд "Бизнес Инкубатор сургалтын төв" ашиглалтад орсноор мэдээлэл холбооны технологийн ашиглан дэд төвийн иргэдэд мэдээлэл хүргэх, өрхийн болон бичил бизнесээ өргөжүүлэх боломж бүрдэх, ажлын байраар хангах, мэргэшүүлэх сургалтуудад хамрагдах, гарааны бизнес эрхлэх болон Нийслэлийн үйлчилгээний нэгдсэн төвийн шинэ салбараар үйлчлүүлэх боломжтой болж байна.
Тус төвийн сургалтын үйл ажиллагааг “Ур чадварыг хөгжүүлэх нь” туршилтын төслийн хүрээнд хэрэгжүүлэх бөгөөд төслийн хүрээнд 5000 иргэнийг үнэ төлбөргүй сургалтад хамруулах юм.
Барилгын хүчин чадал:
- Хүчин чадал: Талбайн хэмжээ - 0,36 га тус бүр
- Хашаан дорторх автомашины зогсоол - 20 машин
- БИТ-ийн барилгын хүчин чадал – 1,206.63 м2
- МСҮТ-ийн барилгын хүчин чадал – 821.93 м2
Уг 2 давхар барилгыг сургалтын болон үйлдвэрлэл, үйлчилгээний зориулалтаар ашиглана.
Ач холбогдол:
МСҮТ-ээр дамжуулан мэргэжил олгосноор мэргэжилтэй ажилчид нэмэгдэнэ. Бизнес эрхлэгчдэд үзүүлэх дэмжлэг, үйлчилгээний хүртээмж сайжирна. Баянхошуу дэд төвд ажлын байр нэмэгдсэнээр ажилгүй байгаа иргэд бизнес эрхлэх боломжтой болно.
